Aiò tutti in Tuscana !

D’uttrovi, semu mossi cù tamanta brama à scopra (troppu à a lestra !) quattru maravigliosi cità, di unu di i vinti righjoni taliani. A Tuscana hè dinò cusì vicinu …. pinseti appena ! Da Bastia, ci si ghjugni in quattru ori.
Partuti à l’alba (quattr’ori di mani ! ohimè!) semu sbarcati in Livorno, cù u so vechju forti, u so cammin di farru è dinò i so raffinarii di pitroliu.
Ùn semu stati tantu spaisati da a vigitazioni, ma i munumenti ci ani tagliatu u soffiu !
Emu pigliatu a strada Aurelia par andà in Pisa induv’è, nantu à a piazza di i Miraculi, ci aspittavani a biata torra chì pendi, a cattedrali, u battisteru è u cimiteriu ; avà po sì chì cunnuscimu u marmaru di Carrara !
Emu intesu dinò dì chì Napulioni ci avia criatu una Scola Normali Supiriori !

U ghjornu dopu in Firenza, malgradu l’acquati di a matinata n’emu imparatu tantu è più à u Palazzu Pitti cù u Giardino di Bobboli ! Pochi i pitturi, affreschi, capi d’opara …
U scopu era di scopra a famiglia di i Medici, famosa ancu pà avè datu dui Papa à a ghjesgia è dui righjini à a Francia ; da Livornu in là, ùn si hè parlatu d’altru ; cunnuscimu puri u nomu di l’ultimu chì regnò, Gian Gastone si chjamava ; essendu senza figlioli a sterpa si persi …
A scuparta di Palazzo Vecchio è di Piazza della Signoria fù un mumentu cummuventi ! Emu presu cuscenza di u pesu di a storia passata …. è di u geniu d’omi com’è Michelangelo, Leonardo da Vinci è tanti altri …
Emu visitatu dinò il Duomo è la Cattedrale, chì maravigli !
Pocu mì, il Perseo, il Davide, a statula di Benvenuto Cellini nantu à Ponte Vecchio è tutti i so ghjuvillarii …
Par compia a ghjurnata, da u Piazzale Michelangelo emu gosu una vista trimenda di a cità !
À l’ustaria, in Montecatini Terme, ci semu campi cù tutti i varietà di pasti!
À quandu spaghetti à a bolognesa, à quandu farfalli in salsa di pomata è ancu « le penne rigate alla carbonara » …

U marcuri dirizzioni Siena cù a so cattedrali, è dopu Piazza del campo induva ellu si teni di lugliu u famosu Palio … U dopu meziornu n’emu pigliatu à San Gimignano, chjamata a piccula New York pà via di i so torri ! Piazza della cisterna emu avutu a furtuna di tastà i ghjacci fatti da un primiatu doppiu campioni di u mondu. « Che buoni ! » !
Disgraziosamenti u ghjovi da mani ci tuccava à ripiglià u battellu par Bastia (ci semu arrizzati torna à 3 ori è mezu di mani !). Semu partuti pieni di ricordi, smaravigliati da ciò ch’è no avemu vistu è intesu.