Quand’ellu ci voli à fà a rima cù cultura è andatura i sculari di u culleghju sò sempri in brama d’impignassi.
Hè ciò chì hè statu fattu u 19 di ghjugnu di u 2012, di pettu à un publicu smaravigliatu, di senta in una prima parti cantà i ziteddi di l’attellu di  cantu corsu direttu da Anghjulu Francescu Alasta, Ghjuvan Filippu Martini (anziani sculari di u culleghju Finuseddu) è di mma Mercuri prufissori di lingua è cultura corsa.
Ma a sirintina ùn era ancu compia… hè statu torna un incantu quandu in siconda parti i ziteddi di l’attellu di tiatru ani ghjucatu à « Pinochju » di Collodi ! Si pudia leghja  a cuntintezza nant’à a faccia di u publicu è a passioni di l’arti chì rispichjava in l’ochji di sti cumidianti-principianti. Cù seriu assai, ogni vennari si sò aduniti ind’a sala d’attività diversi pà imparà è ghjucà u testu chì d’altrondi era bislinguu : una parti in talianu, diretta da mma Caprino, prufissora di talianu è un’altra da mma Sammarcelli, prufissora di lingua è cultura corsa. Ma  hè  ancu stata appinuccia aduprata a lingua di Shakespeare cù u cuncorsu di mma Oricelli, prufissora d’inglesu.
Ch’eddi siani quì arringraziati assai i prufissori, pà suminà lingua, cultura è attempu i sculari, chì oghji raccoglini u fruttu nustrali.
Cù tutti issi lingui rumanichi o altri a ghjuventù di u culleghju soffia nant’à l’avvena, a spiranza di a fratiddanza !!!

Petru SQUARCINI