Vizzavona 2016 - 5a 1

Toccu u mese di farraghju, i sculari di u Cullegiu A.Giovoni facenu a so mossa imbernale à a Casa di a Natura, in Vizzavona.
Sott’à l’ochju bardincu di i so prufissori : Ma Mercuri, Ma Cubells è Mr Paganelli, giranu e « Sette Chjappelle » di a furesta è di u spaziu muntagnolu, bramosi di scopre u so patrimoniu naturale è culturale !
À pedi, strada facendu ne imboccanu nant’à i virgaghji fatti di legnu lariccincu è ne francanu turrenti, fiumi è ghjargalelli d’acqua linda è chjara : « u Fulminatu, l’Agnone.. ». Viaghjanu nant’à i passi di e vistighe è di e tistimunianze di u Neuliticu cù l’ aggrottu : « Southwell ». Pescanu, cù e rituccie i malafruculi acquagnoli in l’acqua pura è cantarina di a « Funtana Nera è di a Tinetta ». Spuntineghjanu à l’ascosu, in lu : « Campu di i Preti ».
Pastori d’una stonda anu fattu u casgiu è intricciatu duie casgiaghje. Arburi, arbe, arbigliule, piante : laricci, faii, ghjallichi, nocca , murza, zaffranu, arba barona è soprafrasca, ùn anu più nisun’ sicretu par elli !
In quant’à e spezie animale prutette, ne anu u ciarbellu mubiliatu : pichjarina, pichju, ghjandaghja, sacchipinnuti è altore.
L’ hè piaciutu assai à nuttulià in cerca di a ghjira, o di a volpe ma sopratuttu ritruvà si di notte in furesta cù e lampane, inturniati da u bughjone è da i rimori chì danu u fretu à a pelle.
Anu amparatu dinò à sceglie e rumenzule dopu ogni ripastu, ghjè statu da veru un bell’avviamentu à u sviluppu in cuntinuu è propiu belle passate di spartera cumuna. U ghjornu di a partenza i nostr’ambraschi si sò colti nant’à « Trinichellu » cù a tristezza di cappià ste loche maestose è ne anu pigliatu a strada di u vultà, cù tante cose à racuntà è centu ritratti à mustrà.
Sò state dicemula puru stonde asgiate è spinsirate. Ch’elli sianu,quì, ringraziati di core, tutti quelli chì si sò impignati indì stu prughjettu !